Dodoma, 12 Aprili 2025, Katika hatua muhimu kuelekea Uchaguzi Mkuu wa mwaka 2025, Katibu Mkuu wa Chama cha National Liberation for Democracy (NLD), Mhe. Doyo Hassan Doyo, leo amesaini Kanuni ya Maadili ya Uchaguzi katika hafla rasmi iliyofanyika jijini Dodoma. Tukio hilo limehusisha viongozi wa vyama mbalimbali vya siasa, maafisa kutoka Tume Huru ya Taifa ya Uchaguzi, na wadau wengine wa uchaguzi.
Mhe. Doyo ameeleza kuwa ushiriki wa NLD katika kusaini kanuni hizo ni ishara ya dhamira ya dhati ya chama chake kushiriki uchaguzi kwa njia ya amani, haki na uwazi. Amesisitiza kuwa NLD itaendelea kushirikiana na wadau wote kuhakikisha kuwa uchaguzi wa mwaka huu unafanyika katika mazingira ya utulivu na kuheshimu misingi ya kidemokrasia.
“Tunatambua wajibu wetu kama chama cha siasa katika kuhakikisha uchaguzi unakuwa huru na wa haki. Kusaini kwa kanuni hizi si tu wajibu wa kisheria, bali ni ahadi ya kisiasa kwa wananchi kuwa tuko tayari kushindana kwa hoja na siyo kwa vurugu,” alisema Mhe. Doyo wakati wa tukio hilo.
Kanuni ya Maadili ya Uchaguzi ni mwongozo unaowalazimu wadau wote wa uchaguzi ikiwemo vyama vya siasa, wagombea, mashabiki na wapiga kura kufuata taratibu, kudumisha amani, kuepuka lugha chafu au uchochezi, na kushirikiana na vyombo vya uchaguzi katika kila hatua ya mchakato.
Tume Huru ya Taifa ya Uchaguzi kupitia kwa Mwenyekiti wake, ilitoa wito kwa vyama vyote kuendelea kuelimisha wafuasi wao juu ya umuhimu wa amani kabla, wakati na baada ya uchaguzi. Pia, Tume ilisisitiza kuwa hatua zitachukuliwa kwa chama au mgombea yeyote atakayekiuka kanuni hizo.
Kwa upande wa NLD, Mhe. Doyo aliwahakikishia wanachama na Watanzania kwa ujumla kuwa chama chake kipo tayari kwa uchaguzi na kinatarajia kuendelea kufanya kampeni za kistaarabu, zenye kuzingatia ajenda za maendeleo na ustawi wa wananchi.
