Katibu wa Halmashauri Kuu ya Chama Cha Mapinduzi (NEC), Itikadi, Uenezi na Mafunzo, Ndugu Paul Christian Makonda ameendelea kutoa wito kwa Viongozi wa Dini mbalimbali nchini, kuendelea na moyo wa imani wa kuiweka katika maombi nchi yetu, pamoja na Kiongozi Mkuu wake, Rais wa Jamhuri ya Muungano wa Tanzania, Mhe. Dkt. Samia Suluhu Hassan, katika majukumu yake ya kuwatumikia Watanzania.
Aidha, Ndugu Makonda amewakumbusha viongozi hao wa kiroho katika jamii kuendelea kuenzi utamaduni mzuri wa siku zote wa dini na madhehebu mbalimbali kushirikiana na Serikali, ambao umekuwepo kuanzia awamu ya kwanza hadi awamu ya sita iliyopo sasa.
Ndugu Makonda ametoa wito huo leo Jumapili, Disemba 24, 2023, alipokwenda kumtembelea Askofu wa Kanisa la Anglikana, Dayosisi ya Dar Es Salaam, Baba Askofu Jackson Sosthenes, ikiwa ni mwendelezo wa ziara za Mwenezi huyo wa CCM, kuwatembelea viongozi na watu wa makundi mbalimbali katika jamii, kwa lengo la kuendeleza ushirikiano na kupokea ushauri.
Kwa upande wake, Baba Askofu Sosthenes katika mazungumzo na maombi, mbali ya kumuombea Mhe. Rais Dkt. Samia Suluhu Hassan, ili azidi kuwa imara katika kazi kubwa anayoifanya ya kuiongoza nchi na watu wake wote, pia amemtakia kila la heri Ndugu Makonda katika utendaji wa majukumu yake, hasa anaposhiriki katika maamuzi mbalimbali ya kusaidia Chama, Serikali na nchi kwa ujumla.
“Lakini zaidi sana Mungu Baba akamuongoze Rais wetu (Dkt. Samia Suluhu Hassan), usiku na mchana, awe na moyo mkuu katika kuongoza Tanzania na kuwaongoza watu wake na kuwafikisha mahali ambapo wewe Mungu umekusudia,” amesema Baba Askofu Sosthenes.
