Awakumbusha waliotoa ahadi zao kuzikamilisha ili kuendelea kuiwezesha Taasisi ya Professor Jay Foundation_
Katibu wa Halmshauri Kuu ya Chama Cha Mapinduzi (CCM) Taifa, Itikadi, Uenezi na Mafunzo Ndugu. Paul Makonda , ametimiza ahadi yake ya kumchangia Tsh Milioni 10 kwa aliyekuwa Mbunge wa Jimbo la Mikumi na Mwanamuziki wa (HipHop) Nchini Bw. Joseph Haule Maarufu Professor Jay.
Mwenezi Makonda ametimiza ahadi hiyo leo tarehe 21 Disemba, 2023 alipofika nyumbani kwa Professor Jay Mbezi Jijini Dar es salaam.
Pia, Mwenezi Makonda amemkabidihi Professor Jay kiasi kingine cha fedha Tsh Milioni 10 ikiwa ni mchango kutoka kwa Ndugu wa Mwenezi Makonda na kupelekea kuwa amekabidhi jumla ya Tsh Milioni 20.
Akizunguma na Mwenezi Makonda, Professor Jay amebainisha changamoto ya umbali anayoipata kutoka Mbezi hadi kufika Hospitali ya Muhimbili ambapo Mwenezi Makonda amemuahidi kumtafutia Nyumba na kumlipia eneo la Upanga ili kusudi kuepukana na changamoto hiyo anayoipitia.
Aidha, Mwenezi Makonda amemuahidi Professor Jay kumsaidia katika kuwakumbushia wale wote walioahidi kumchangia kukamilisha ahadi zao.
Ikumbuke kuwa Mwenezi Makonda alitoa ahadi yake binafsi kumchangia Professor Jay siku ya tarehe 10 katika uzinduzi wa #ProfessorJayFoundation ili kupeleka tabasamu na kusaidia wagonjwa wa figo Nchini.
